'S BODAHAUS ÖN SOLLA

Da is amoi ön Solla ¹⁾ änt a Bodahaus gschtana ²⁾. Da Boda, ham s' gsoat ³⁾, hot mehra kinna als Braoutössn ⁴⁾ und soi mitn Spangla Franzei ⁵⁾ ön Bund gschtana sei. An an Sunnta ön da Früah, wie Aeut öns Amt a(u)f Wollaberg ⁶⁾ san ganga, is dös Bodahaus vaschwundn gwön. Und durt, wo dös Haus is gwön, is oft af amoi a Brunnfluß ⁷⁾ grunna. Sehgt ma'n heunt no. Do hot sö bei da Nocht nöamt möa vobeitraut, wei(l)'s umganga is. Oft hot amoi a Möschei ⁸⁾ gsoat, si fürcht si nöt und gang umi bei da Nocht. A poor Mannsbilda ham's nöt glaabn wölln un ham gwött mit ihr, ham ihr a(u)fgöbn, sie muaß vo dränt wos mitbringa. 's Möschei geht oft umi, sehgt wos la(u)fa, packt's, tuat's ön's Füada ⁹⁾ ei und rönnt schnuastracks wieda hoamzua. Wia's ön da Stubn drinn is, mocht's ös Füada a(u)f, springt a Spofakl ¹⁰⁾ außa, dös oba augenblicklö vaschwuna ¹¹⁾ is. 's Möschei hot sö a so daschreckt, daß's umgfolln is un taout ¹²⁾ gwön is.

1) Solla - Dorf in der Gemeinde Stadl bei Waldkirchen.
2) gestanden.
3) gesagt.
4) Brotessen.
5) der Teufel.
6) Wollaberg.
7) eine Quelle.
8) Mädchen.
9) Fürtuch - Schurz.
10) Spanferkel.
11) verschwunden.
12) tot.

Michael Waltinger, Niederbayerische Sagen